काठमाडौं । निर्वाचन आयोगले आगामी फागुन २१ गतेका निर्वाचनलाई आवश्यक मतपेटिका,​मतपत्र,​अमिट मसी,​स्ट्याम्प प्याड र मसी लगाएतका ५१ प्रकारका निर्वाचन सामग्रीको सूची तय गरेको छ।

निर्वाचनमा आयोगले स्वदेशी उत्पादन, मितव्ययिता र वातावरणीय संरक्षणलाई मुख्य प्राथमिकतामा राखेको छ।
आयोगका अनुसार ५१ प्रकारका सामग्रीमध्ये ३७ प्रकारका सामग्री स्थानीय स्तरकै प्रयोग गरिनेछ। स्थानीय स्रोत-साधनको प्रवर्द्धन र ढुवानी खर्च कम गर्न विकेन्द्रीकरण पद्धति अपनाउँदै स्थानीय सामग्रीलाई जोड दिइएको हो।

बाँकी १४ प्रकारका विशेष प्राविधिक सामग्रीहरू भने निर्वाचन आयोगले नै उपलब्ध गराउने बताएको छ। जसमा ९ प्रकारका सामग्रीमात्र नयाँ खरिद गर्नुपर्ने छ ।

निर्वाचन व्यवस्थापनलाई चुस्त बनाउन आयोगले समयतालिका समेत सार्वजनिक गरेको छ। जसअनुसार आगामी फागुन २ गतेभित्रै सबै मतदानस्थलमा आवश्यक निर्वाचन सामग्रीहरू पठाइसक्ने लक्ष्य आयोगको छ ।