काठमाडौं । आज कोजाग्रत पूर्णिमा, नेपालीहरूको महान् चाड बडादशैंको समापन र लक्ष्मीको स्वागतको दिनका रूपमा देशभर मनाइँदै छ ।

यस दिन रातभर जाग्राम बस्दै धनधान्यकी देवी महालक्ष्मीको पूजा–आराधना गर्ने परम्परा छ । धार्मिक विश्वासअनुसार आज रात जाग्राम बसेका घरमा पृथ्वी भ्रमण गर्दै हिँडेकी महालक्ष्मी प्रवेश गरी ऐश्वर्य र सम्पन्नता प्रदान गर्छिन् ।

आश्विन शुक्ल दशमी अर्थात् विजयादशमीदेखि सुरु भएको टीका र जमरा लगाउने क्रम आजको पूर्णिमासम्म जारी रहन्छ । नेपाल पञ्चाङ्ग निर्णायक विकास समितिका अनुसार, अखिल बलि पूर्ति नभएसम्म देवीको प्रसादस्वरूप टीका–जमरा लगाउन सकिन्छ, जुन शास्त्रसम्मत मानिन्छ ।

बिहानै दशैंघरका फूल, प्रसाद र जमराको अवशेष नदी, पोखरी वा तीर्थस्थलमा विसर्जन गर्ने चलन छ ।

यसै दिनदेखि कात्तिक स्नान र आकाशदीप दान सुरु हुने प्रचलन पनि छ, जसले तिहारको तयारीको संकेत गर्छ ।

कोजाग्रत पूर्णिमालाई ‘कौमुदी पूर्णिमा’ पनि भनिन्छ, र यसले दशैंको बिदा र तिहारको आगमन दुबैको प्रतीक बोक्छ ।