काठमाडौं – सत्तारुढ दल नेपाली कांग्रेस निकट नेपाल तरुण दलले राजधानीमा जेनजी पुस्ताले आयोजना गरेको भ्रष्टाचारविरोधी आन्दोलनप्रति आफ्नो दृष्टिकोण सार्वजनिक गर्दै शान्तिपूर्ण रूपमा आन्दोलन गर्न युवाहरूसँग आग्रह गरेको छ।

तरुण दलका अध्यक्ष विद्वान गुरुङले जारी गरेको विज्ञप्तिमा भनिएको छ, “सरकारले सूचीकृत गर्न आउनू भनेर जारी गरेको सूचना अनुसार फेसबुक, ट्वीटरलगायतका सामाजिक सञ्जालहरू बन्द भएपछि आक्रोशित युवा पुस्ताले आयोजना गरेको जेनजी पुस्ताको आन्दोलनमा घुसपैठ हुन सक्ने आशङ्का लागेको छ।”

गुरुङका अनुसार, भ्रष्टाचारविरुद्ध नेपाली कांग्रेस र तरुण दलले सधैंभरी आवाज बुलन्द गर्दै आएको छ। उनले थपे, “जेनजी पुस्तालाई हामी ध्यानाकर्षण गराउन चाहन्छौं–आज स्वतःस्फूर्त रूपमा आन्दोलन गर्न पाउनुभएको अवसर तिनै नेताहरूको त्याग र बलिदानले ल्याएको परिवर्तनको कारणले सम्भव भएको हो। तर कुनै नेताको छोरा वा छोरी भएकै कारण विरोध गर्नु कसरी न्यायसंगत हुन्छ, जेनजीलाई हाम्रो प्रश्न यही हो।”

विज्ञप्तिमा उल्लेख छ कि फेसबुक, मेटा, युट्युबजस्ता सामाजिक सञ्जाल बन्द भएकाले धेरै युवाहरू डिजिटल प्रविधिको उपयोगबाट वञ्चित भएका छन्, र यही कारणले आजको आन्दोलन आयोजना गरिएको हो।