काठमाडौं । नेपाल सरकारले सामाजिक सञ्जालहरूको नियमनका लागि चालेको कदमपछि एक्स (पहिलेको ट्विटर) र वीच्याट जस्ता ठूला प्लेटफर्महरूले सूचीकरणका लागि चासो देखाएका छन्। सरकारले बिहीबार २६ वटा सामाजिक सञ्जाल बन्द गर्न निर्देशन दिएसँगै यी प्लेटफर्महरूले सञ्चार तथा सूचना प्रविधि मन्त्रालयलाई सम्पर्क गरेका हुन्।

बिहीबारको सरकारी निर्देशनपश्चात् शुक्रबारदेखि नेपालमा धेरै सामाजिक सञ्जालहरूमा पहुँच अवरुद्ध भएको छ, जसका कारण प्रयोगकर्ताहरूले समस्या भोगिरहेका छन्।

मन्त्रालयका सूचना अधिकारी रविन्द्रप्रसाद पौड्यालले एक्स र वीच्याटका प्रतिनिधिहरूले सम्पर्क गरेर नेपालमा सञ्चालनका लागि आवश्यक प्रक्रियाबारे चासो देखाएको जानकारी दिए। “एक्स र वीच्याटले चासो देखाएको छ, तर उनीहरूले अहिलेसम्म आधिकारिक रूपमा निवेदन दिइसकेका छैनन्,” पौड्यालले भने।

यसअघि, लोकप्रिय नेपाली एप हाम्रो पात्रोले भने बिहीबार नै आवश्यक कागजातसहित निवेदन दिएर सूचीकरणको प्रक्रियामा गइसकेको छ। यसका अतिरिक्त, फेसबुकको प्यारेन्ट कम्पनी मेटाका प्रतिनिधिले पनि सिंगापुरबाट सम्पर्क गरेका छन्। मन्त्रालयले मेटाका प्रतिनिधिलाई इमेलमार्फत सूचीकरण प्रक्रिया र आवश्यक कागजातहरूको विस्तृत जानकारी उपलब्ध गराएको छ।

सरकारले सामाजिक सञ्जाल नियमनका लागि ‘सामाजिक सञ्जाल सञ्चालन (व्यवस्थापन) निर्देशिका, २०८१’ लागू गरेको छ, जसअनुसार नेपालमा सञ्चालनमा रहेका सबै सामाजिक सञ्जालहरू मन्त्रालयमा दर्ता हुनुपर्छ। दर्ता नभएका र नियम पालना नगर्ने प्लेटफर्महरूलाई बन्द गर्ने अधिकार सरकारलाई छ। यो कदमले नेपालमा सामाजिक सञ्जालको भविष्य र प्रयोगकर्ताहरूको अनुभवमा कस्तो असर पर्छ भन्ने विषयमा बहस सुरु भएको छ।