काठमाडौं । ताप्लेजुङमा नयाँ अलैँची बाली बजारमा आएको दुई हप्ता नपुग्दै यसको मूल्यमा गिरावट आएको छ, जसले किसान र व्यवसायीहरूलाई चिन्तित बनाएको छ। हालै सुरु भएको अलैँचीको सिजनमा प्रति मन (४० किलो) को मूल्य रु ८८,००० बाट घटेर अहिले रु ८४,००० पुगेको छ।

ताप्लेजुङ उद्योग वाणिज्य सङ्घका अध्यक्ष भद्रवीर रेग्मीका अनुसार बिहीबारदेखि मूल्य घटेको हो। मूल्य घट्नुको कारण भने स्पष्ट छैन। अध्यक्ष रेग्मीले नेपालको अलैँचीको मूल्य अन्तर्राष्ट्रिय बजारमा निर्भर हुने भएकाले अन्तर्राष्ट्रिय बजारबाट नै मूल्य घटेर आएको हुनसक्ने अनुमान गरेका छन्।

यस वर्षको सुरुमा अलैँचीको मूल्य राम्रो भएकाले किसान र व्यवसायी उत्साहित भएका थिए। गत वर्षको तुलनामा यस वर्ष सुरुमै प्रति मन रु ६,००० बढीमा कारोबार हुँदा सबै खुसी थिए। गत वर्ष नयाँ अलैँची बजारमा आउँदा प्रति मन रु ८२,००० मा कारोबार भएको थियो। तर, अहिले मूल्यमा आएको उतारचढावका कारण उनीहरूमा निराशा छाएको छ।

किसान तथा व्यवसायीहरूले अलैँचीको मूल्यमा हुने अस्वाभाविक उतारचढावभन्दा स्थिर मूल्यको अपेक्षा गरेका छन्। स्थिर र उचित मूल्यले मात्र निराशाबाट बचाउन सक्ने उनीहरूको भनाइ छ।

ताप्लेजुङमा अलैँचीको मुख्य उत्पादन सिजन असोज महिनापछि सुरु हुन्छ। यो जिल्लाको प्रमुख नगदे बालीमध्ये एक हो। कृषि ज्ञान केन्द्र ताप्लेजुङका अनुसार यहाँ ४,१६५ हेक्टर क्षेत्रफलमा अलैँची खेती गरिन्छ। गत वर्ष यस खेतीबाट २,५३१ मेट्रिक टन अलैँची उत्पादन भएको थियो। यस वर्ष फल राम्रो नलागेकाले उत्पादन घट्न सक्ने किसानको अनुमान छ।