काठमाडौं । थाइल्याण्डको संवैधानिक अदालतले प्रधानमन्त्री पाटोङटार्न शिनावात्रालाई पदच्युत गर्ने फैसला सुनाएको छ। अदालतले हालै लीक भएको विवादास्पद फोनवार्तालाई ‘नैतिक आचरणको गम्भीर उल्लङ्घन’ ठहर गर्दै उनलाई तत्काल पदबाट हटाउने निर्णय गरेको हो।

अदालतको फैसलामा भनिएको छ, “पाटोङटार्नले राष्ट्रको गौरव जोगाउन असफल भइन् र आफ्नो व्यक्तिगत स्वार्थलाई राष्ट्रको हितभन्दा अगाडि राखिन्, जसले प्रधानमन्त्री पदप्रति जनविश्वास गुमाएको छ।”

३७ वर्षीया शिनावात्राले उक्त फोनवार्तामा प्रयोग गरिएको भाषालाई ‘सम्झौताका लागि अपनाइएको रणनीति’ भनेर आफ्नो बचाउ गरेकी थिइन्। तर अदालतले उनको तर्क अस्वीकार गर्दै वार्ताबाट क्याम्बोडियालाई फाइदा पुग्ने आशंका बढेको, र त्यसले थाइल्याण्डको सार्वभौमिक हितमा आघात पुगेको बताएको छ।

गत जुलाईमा क्याम्बोडियाका नेता हुन सेनसँग भएको शिनावात्राको गोप्य फोनवार्ता सार्वजनिक भएपछि उनी तीव्र आलोचनाको घेरामा परेकी थिइन्। त्यसयता उनी निलम्बनमा थिइन्।

संवैधानिक अदालतको यस निर्णयसँगै शिनावात्राको प्रधानमन्त्री पद समाप्त भएको छ भने मन्त्रीपरिषद् पनि स्वतः विघटन भएको छ। उनी २००८ यता अदालतबाट पद गुमाउने पाँचौं प्रधानमन्त्री बनेकी छन्।

‘उङ इङ’ उपनामले चिनिने पाटोङटार्न २०२१ मा फ्यु थाइ पार्टीमा प्रवेश गरेकी थिइन् र २०२३ मा पार्टी नेतृ बनेकी थिइन्। स्रेत्था थाविसिनलाई हटाएपछि संसद्ले उनलाई देशकी कान्छी (३७ वर्ष) र दोस्रो महिला प्रधानमन्त्रीका रूपमा चयन गरेको थियो। यसअघि उनकी काकी यिङलक शिनावात्रा २०११ देखि २०१४ सम्म प्रधानमन्त्री थिइन्।

शिनावात्रा परिवार थाइल्याण्डको राजनीतिमा दशकौँदेखि प्रभावशाली रहँदै आएको छ। पाटोङटार्नको पदच्युतिलाई यस वंशको लागि गम्भीर राजनीतिक झट्का मानिएको छ।