काठमाडौं । प्रधानमन्त्री केपी शर्मा ओलीले वीरगञ्जमा फैलिएको हैजा र झाडापखालाको संक्रमण नियन्त्रणका लागि नेपाली सेना, नेपाल प्रहरी र सशस्त्र प्रहरीसहित तीनै तहका सुरक्षाकर्मीहरूलाई सक्रिय रूपमा परिचालन गर्ने निर्णय भएको बताएका छन्।

शुक्रबार संसद्मा सम्बोधन गर्दै प्रधानमन्त्री ओलीले मन्त्रिपरिषद्को बैठकले स्वास्थ्य मन्त्रालयको समन्वयमा सुरक्षाकर्मीहरूमा कार्यरत स्वास्थ्यकर्मी, चिकित्सक तथा उपकरणको प्रयोग गरेर हैजा नियन्त्रणको लागि तीव्र प्रयास सुरु गरिने निर्णय गरेको जानकारी दिए।

“स्वास्थ्य मन्त्रालयको समन्वयमा सेना, प्रहरी र सशस्त्र प्रहरीका नर्स, डाक्टर र उपकरणको प्रयोग गरेर हैजा नियन्त्रणमा तीव्र ढंगले काम भइरहेको छ,” प्रधानमन्त्री ओलीले भने। “स्रोत पत्ता लगाउनेदेखि उपचार र रोकथामसम्मका सबै पक्षमा सरकार सक्रिय छ।”

उनका अनुसार, हैजाको संक्रमण कसरी र कहाँबाट फैलियो भन्नेबारे छानबिन भइरहेको छ। ढल, खानेपानी वा अन्य कुनै माध्यमबाट संक्रमण फैलिएको हो कि भन्नेबारे परीक्षण जारी रहेको जानकारी उनले दिए।

प्रधानमन्त्री ओलीले स्वास्थ्य मन्त्रालयको नेतृत्वमा रोकथाम, उपचार र निदानको प्रयासलाई प्राथमिकता दिइएको बताए। साथै, हैजा र झाडापखालाका औषधी नि:शुल्क उपलब्ध गराइरहेको र नारायणी उपक्षेत्रीय अस्पतालमा बिरामीको नि:शुल्क उपचार भइरहेको जानकारी दिए।

कोरोनाकालमा नेपाली सेनाले बनाएको अस्पताल प्रयोग गरेर पनि उपचारको व्यवस्था मिलाउने प्रयास भइरहेको उनले उल्लेख गरे।

उनका अनुसार, हालसम्म वीरगञ्जमा ६२४ जनामा हैजा तथा झाडापखालाको संक्रमण पुष्टि भएको छ, जसमा ४३७ जना उपचारपछि घर फर्किसकेका छन्। हाल १८७ जना संक्रमितको उपचार जारी छ भने पछिल्लो २४ घण्टामा मात्र ८४ जना नयाँ संक्रमित थपिएका छन्। अहिलेसम्म हैजा र झाडापखालाका लक्षण देखिएका ३ जनाको मृत्यु भएको छ।

सरकारले संक्रमणलाई नियन्त्रण गर्न सक्दो छिटो कारबाही गरिरहेको र थप संक्रमित नहोस् भन्नेमा गम्भीर ध्यान दिइएको प्रधानमन्त्री ओलीले स्पष्ट पारे।