काठमाडौं । नेपालको एक मात्र अन्तर्राष्ट्रिय मान्यता प्राप्त रंगशाला, दशरथ रंगशालामा अब फिफा र एएफसीका आधिकारिक फुटबल खेलहरू आयोजना नहुने भएका छन्।

एसियन फुटबल कन्फेडेरेसन (एएफसी) ले हालै रंगशालाको निरीक्षण गर्दा आवश्यक मापदण्ड नपुगेको निष्कर्ष निकाल्दै, फिफा तथा एएफसी अन्तर्गतका प्रतियोगिता यहाँ खेलाउन नमिल्ने निर्णय सुनाएको हो।

अखिल नेपाल फुटबल संघ (एन्फा) का महासचिव किरण राईका अनुसार, अब दशरथ रंगशालामा कुनै पनि फिफा वा एएफसीका मान्यता प्राप्त खेलहरू हुन सक्ने छैनन्।

“जबसम्म रंगशालाले फिफा र एएफसीको मापदण्ड पूरा गर्दैन, तबसम्म त्यहाँ आधिकारिक खेल हुन सक्दैन,” राईले भने।

यद्यपि उनले साफ च्याम्पियनसिपजस्ता क्षेत्रीय तथा अन्य अन्तर्राष्ट्रिय सिरिज भने दशरथ रंगशालामा जारी रहने जानकारी दिए। “फिफाका खेल नभए पनि, नेपाली दर्शकले साफ र अन्य अन्तर्राष्ट्रिय सिरिज भने घरेलु मैदानमै हेर्न पाउनेछन्,” उनले थपे।

दशरथ रंगशाला यसअघि पनि पटक–पटक एएफसीको निरीक्षणमा अयोग्य ठहरिँदै आएको छ। यही कारण नेपालले २०२६ को विश्वकप छनोट र एएफसी एसियन कप २०२७ का छनोट खेलहरू समेत आफ्नै मैदानमा खेल्न पाएको थिएन।