काठमाडौं । राष्ट्रिय स्वतन्त्र पार्टी (रास्वपा) का केन्द्रीय सदस्य डा. अरनिको पाँडेल जिल्ला अदालत काठमाडौंमा बयान दिन उपस्थित भएका छन्।

उनको बयान काठमाडौं जिल्ला अदालतका न्यायाधीश ध्रुवराज कार्कीको इजलासमा हुने भएको छ। बयान सम्पन्न भएपछि आजै थुनछेक बहस हुने कार्यक्रम रहेको छ। बहसपछि पाँडेललाई मुद्दाको पुर्पक्षका लागि धरौटीमा रिहा गर्ने कि थुनामा पठाउने भन्नेबारे अदालतले आदेश जारी गर्नेछ।

डा. पाँडेलविरुद्ध विद्युतीय कारोबार ऐनअन्तर्गतको कसुरमा मुद्दा दर्ता गरिएको हो। एक महिलाले उनलाई सामाजिक सञ्जाल, विशेषगरी ह्वाट्सएपमार्फत गालीगलौज गरेको आरोप लगाउँदै साइबर ब्युरोमा उजुरी दिएकी थिइन्। सोही उजुरीका आधारमा पाँडेललाई बुधबार साइबर ब्युरोमा उपस्थित गराइएको थियो। अहिले उनलाई दरबारमार्गस्थित प्रहरी वृत्तमा राखिएको छ।

यसअघि बिहीबार अदालतले उनलाई सो कसुरमा अनुसन्धान गर्न चार दिनको म्याद दिएको थियो।

पर्यावरणविद् समेत रहेका डा. पाँडे २०७९ साल भदौमा रवि लामिछाने नेतृत्वको रास्वपामा प्रवेश गरेका थिए। पार्टी सरकारमा रहँदा उनी २०८० सालमा राष्ट्रिय योजना आयोगको सदस्यसमेत नियुक्त भएका थिए।