काठमाडौं । भारत र क्यानडाले परस्पर कूटनीतिक सम्बन्धलाई नयाँ गति दिन दुवै देशमा उच्चायुक्तको नियुक्ति गरेका छन्।

भारत सरकारले अनुभवी कूटनीतिज्ञ दिनेश के. पटनायकलाई क्यानडाका लागि नयाँ उच्चायुक्त नियुक्त गरेको छ। हाल स्पेनमा भारतका राजदूत रहेका पटनायकले चाँडै नै ओटावा पुगेर आफ्नो नयाँ जिम्मेवारी सम्हाल्ने भारतीय परराष्ट्र मन्त्रालयले जनाएको छ।

यता, क्यानडाले पनि भारतका लागि नयाँ उच्चायुक्तको घोषणा गरेको छ। बीबीसीका अनुसार, क्रिस्टोफर कूटरलाई भारतस्थित क्यानडाको नयाँ उच्चायुक्त बनाइएको हो। यो पद झण्डै एक वर्षदेखि रिक्त थियो।

क्यानडाकी विदेश मन्त्री अनिता आनन्दले वक्तव्य जारी गर्दै नयाँ नियुक्तिले भारतसँगको सम्बन्धलाई मजबुत पार्ने संकेत दिएको बताइन्। उनले भनिन्, “उच्चायुक्तको नियुक्तिले भारतसँगको कूटनीतिक सम्बन्धलाई गहिरो बनाउने र सहकार्यलाई अघि बढाउने हाम्रो प्रतिबद्धता देखाउँछ।”

भारतका अघिल्ला उच्चायुक्तले गत अक्टोबरमा क्यानडा छोडेका थिए। निज्जर हत्याकाण्डसँग जोडिएको विवादपछि क्यानडाले ६ जना भारतीय कूटनीतिज्ञलाई निष्कासन गरेको थियो, जसमा उच्चायुक्त पनि परेका थिए। भारतले भने ती उच्चायुक्तलाई आफूले फिर्ता बोलाएको दाबी गरेको थियो।

त्यसै क्रममा भारतले पनि प्रतिक्रिया स्वरूप छ जना क्यानडाली कूटनीतिज्ञलाई निष्कासन गरेको थियो। तीमध्ये तत्कालीन कार्यवाहक उच्चायुक्त समेत परेका थिए।

भारत–क्यानडा सम्बन्धमा गत वर्ष तनाव सिर्जना भएको थियो, जब तत्कालीन प्रधानमन्त्री जस्टिन ट्रुडोले क्यानडामा हत्या गरिएका सिख अलगाववादी नेता हरदीप सिंह निज्जरको घटनामा भारतको संलग्नता रहेको आरोप लगाएका थिए। भारतले भने ती आरोपहरूलाई निरन्तर खारेज गर्दै आएको छ।