काठमाडौं । नेपाली बजारमा सुनको मूल्यले पुनः नयाँ रेकर्ड कायम गरेको छ। शुक्रबार (आज) छापावाल सुनको मूल्य प्रतितोला २ लाख ६ सय रुपैयाँ पुगेको नेपाल सुनचाँदी व्यवसायी महासंघले जनाएको छ।

अघिल्लो दिनको तुलनामा आज सुनको मूल्यमा प्रतितोला १२ सय रुपैयाँले वृद्धि भएको हो। यसअघि साउन २३ गते कायम भएको १ लाख ९९ हजार ४ सय रुपैयाँको रेकर्ड तीन सातामै तोडिएको हो।

त्यस्तै, चाँदीको मूल्यमा पनि सामान्य वृद्धि देखिएको छ। अघिल्लो दिन प्रतितोला २३५५ रुपैयाँमा कारोबार भएको चाँदी आज ५ रुपैयाँ बढेर २३६० रुपैयाँमा पुगेको छ। चाँदीको यो मूल्य पनि अहिलेसम्मकै उच्च हो।

नेपाल सुनचाँदी व्यवसायी महासंघका अनुसार अन्तर्राष्ट्रिय बजारको उतारचढावसँगै भाउमा लगातार वृद्धि भइरहेको छ।