काठमाडौं । कांग्रेसकी सांसद ईश्वरी न्यौपाने संसदीय सुनुवाइ समितिको सभापति पदबाट राजीनामा दिने तयारीमा रहेकी छन्। आज बिहान बसेको नेपाली कांग्रेसको पदाधिकारी बैठकले उनलाई प्रतिनिधिसभाको राज्यव्यवस्था तथा सुशासन समितिको सभापतिमा उम्मेदवार बनाउने निर्णय गरेपछि उनले वर्तमान पदबाट राजीनामा दिने निर्णय लिएको हो।

कांग्रेसका प्रमुख सचेतक श्याम घिमिरेका अनुसार एउटै व्यक्ति दुईवटा संसदीय समितिको सभापति बन्न नमिल्ने नियम भएकाले न्यौपानेले संसदीय सुनुवाइ समितिबाट राजीनामा दिन लागेकी हुन्।

घिमिरेले भने, “कांग्रेसले राज्यव्यवस्था तथा सुशासन समितिको सभापतिमा माननीय ईश्वरी न्यौपानेलाई उम्मेदवार बनाउने निर्णय गरेको छ। उहाँले त्यस पदमा उम्मेदवारी दिनुहुन्छ, त्यसैले सुनुवाइ समितिबाट राजीनामा दिन लाग्नुभएको हो।”

यसअघि सो समितिका सभापति रहेका कांग्रेस सांसद रामहरी खतिवडा विवादमा तानिएपछि पदबाट राजीनामा दिएका थिए। संघीय निजामती सेवा विधेयकमा ‘कुलिङ पिरियड’ सम्बन्धी प्रावधानलाई लिएर आलोचना भएपछि गठित छानबिन समितिले खतिवडालाई नैतिक रूपमा जिम्मेवार ठहर गरेपछि उनले संसदलाई सम्बोधन गर्दै सभापति पदबाट राजीनामा दिएका थिए।

राज्य व्यवस्था तथा सुशासन समितिको सभापति पद कांग्रेसले पाएको हो र एमालेसँग सहमति भएकाले अन्य दलहरूले दाबी नगर्ने बुझिएको छ।

निर्वाचन तालिका:

संघीय संसद सचिवालयका सचिव हर्कराज राईद्वारा सोमबार जारी गरिएको कार्यतालिका अनुसार:

मनोनयन दर्ता: सोमबार दिउँसो १ बजेबाट ४ बजेसम्म

उम्मेदवारको नामावली प्रकाशन: सोमबार सवा ४ बजे

निर्वाचन मिति: बुधबार दिउँसो ३ बजे, राज्यव्यवस्था तथा सुशासन समितिको सभाकक्षमा

संघीय संसद नियमावलीअनुसार समिति सभापतिको पद रिक्त भएको १५ दिनभित्र नयाँ सभापति चयन गर्नुपर्ने व्यवस्था छ, जसअनुसार यो निर्वाचन प्रक्रिया अघि बढाइएको हो।