काठमाडौं । यस वर्षको हरितालिका तीजका लागि पशुपतिनाथ मन्दिरमा सबै तयारी पूरा भएको छ। भदौ १० गते मंगलबार मनाइने तीजका लागि पशुपति क्षेत्र विकास कोषले दर्शनार्थीका लागि विशेष व्यवस्था मिलाएको छ।

दर्शनका लागि विशेष व्यवस्था
तीजको दिन बिहान ३ बजेदेखि नै पशुपतिनाथका चारवटै ढोका खोलिनेछन् ताकि भक्तजनले छिटो दर्शन गर्न सकून्। दर्शनका लागि चारवटा छुट्टाछुट्टै लाइनको व्यवस्था गरिएको छ:

पहिलो लाइन: गुह्येश्वरी–गौरीघाट–उमाकुण्ड–रुद्रगाडेश्वर–वासुकी हुँदै उत्तर ढोकाबाट प्रवेश।

दोस्रो लाइन: मित्रपार्क–जयवागेश्वरी–भुवनेश्वरी हुँदै फलामेपुल–पश्चिम सानो ढोकाबाट प्रवेश।

तेस्रो लाइन: पिङ्गलास्थान–वनकाली–चार शिवालय हुँदै पञ्चदेवल–दक्षिण ढोकाबाट प्रवेश।

चौथो लाइन: बत्तीसपुतली–गौशाला हुँदै बागमती नदीको पूर्वी किनारबाट आर्यघाट नजिकको पुल तरेर पूर्व ढोकाबाट प्रवेश र बाहिरिने व्यवस्था।

सुरक्षा र सुविधा
कोषका अनुसार, चोरी र लुटपाटबाट जोगिनका लागि बहुमूल्य गरगहना नलगाउन र सम्भव भएसम्म साना बालबालिकालाई साथमा नल्याउन अनुरोध गरिएको छ।

यसैगरी, भक्तजनको सवारीसाधन पार्किङका लागि सिफलचौर, तिलगंगाको खाली स्थान र कोषको कार्यालय परिसरमा व्यवस्था मिलाइएको छ। ज्येष्ठ नागरिक, असक्त, बिरामी र काखे बालक बोकेका महिलाहरूलाई सहज दर्शनका लागि पनि विशेष प्रबन्ध गरिएको छ।

पशुपति क्षेत्रमा बागमती नदीमा पानीको बहाव बढेकाले कुनै पनि सम्भावित विपत्तिबाट बच्न विपद् प्रतिकार्य टोली पनि तैनाथ गरिएको छ।
दर्शनसम्बन्धी महत्वपूर्ण जानकारी
कोषले एकैपटक धेरै भक्तजनले दर्शन गर्न सक्ने गरी हरेक २ सेकेन्डमा ८ जनाले मन्दिर प्रवेश गर्न मिल्ने व्यवस्था गरेको जनाएको छ। साथै, मन्दिरमा प्रवेशका लागि शिष्ट र सभ्य पहिरनमा आउन अनुरोध गरिएको छ।