काठमाडौं । गाजा सहरमा इजरायलले गरेको निरन्तरको बमबारीले सर्वसाधारणको जीवनमा गम्भीर मानवीय संकट निम्त्याएको छ । संयुक्त राष्ट्रसंघका मानवीय निकायहरूले जारी गरेको प्रतिवेदनले नागरिकको मृत्यु, विस्थापन र कुपोषणको अवस्था भयावह रहेको देखाएको छ ।

हवाई हमलाले निम्त्याएको क्षति
संयुक्त राष्ट्रसंघको मानवीय मामिलाको समन्वय कार्यालय (ओचा) का अनुसार, इजरायलका आक्रमणहरू विशेषगरी पूर्वी तथा दक्षिणी गाजाका अज–जयतुन क्षेत्रमा केन्द्रित छन् । ओचाको तथ्यांकअनुसार, अगस्त ८ यता मात्रै ५० भन्दा बढी आवासीय घरमा आक्रमण भएको छ, जसमा कम्तीमा ८७ जना प्यालेस्टिनी नागरिकको ज्यान गएको छ ।

यसैगरी, डेइर अल–बलाहमा रहेको एक विस्थापित शिविरमा पनि हवाई आक्रमण भएको थियो । यद्यपि, इजरायली सेनाले समयमै चेतावनी दिएका कारण त्यहाँ रहेका करिब २०० परिवार सकुशल बाहिर निस्कन सफल भए । आक्रमणबाट शिविरका टहरा र सरसामान पूर्ण रूपमा नष्ट भएका छन् भने नजिकै रहेको ओचाको कार्यालयमा पनि सामान्य क्षति पुगेको छ । ओचाले नागरिक पूर्वाधारलाई कुनै पनि हालतमा लक्षित गर्न नहुने स्पष्ट पारेको छ ।

बढ्दो विस्थापन र कुपोषणको समस्या
गाजामा विस्थापनको समस्या झन् गहिरिएको छ । ओचाका साझेदारहरूको तथ्यांकअनुसार, अगस्त १२ देखि २० सम्म मात्रै १६ हजार ८०० भन्दा बढी सर्वसाधारण फेरि विस्थापित भएका छन् । मार्चमा युद्धविराम अन्त्य भएयता विस्थापित हुनेको कुल संख्या ७ लाख ९६ हजार नाघेको छ, जसको ९५ प्रतिशत गाजा सहरबाट विस्थापित भएका छन् ।

यसबाहेक, बालबालिकाहरूमा कुपोषणको अवस्था पनि अत्यन्तै दयनीय बनेको छ । संयुक्त राष्ट्रसंघीय बालकोष (युनिसेफ) का अनुसार, यस वर्ष कुपोषणका कारण मृत्यु भएका पाँच वर्ष मुनिका बालबालिकामध्ये ८५ प्रतिशत को मृत्यु जुलाई महिनामा भएको हो । युनिसेफका अनुसार, अहिले गाजामा करिब ३ लाख २० हजार बालबालिका तीव्र कुपोषणको जोखिममा छन्, जसले उनीहरूमा रोग र दीर्घकालीन स्वास्थ्य समस्याको खतरा बढाएको छ ।

बारम्बारको विस्थापन र खाद्य संकटका कारण बालबालिकाहरू सडक किनारामा सामान बेच्ने र भग्नावशेष संकलन गर्ने जस्ता जोखिमपूर्ण काम गर्न बाध्य भएका छन्, जसले उनीहरूमा मानसिक तनाव समेत गहिरिँदै गएको ओचाले जनाएको छ ।