काठमाडौं । आगामी साउन २३ गतेबाट प्रदर्शनमा आउने फिल्म ‘सिटामोल’को पहिलो गीत ‘झुम्का कानैमा’ सार्वजनिक गरिएको छ । कर्णाली प्रदेशमा प्रचलित हुड्के नाचमा तयार गरिएको गीतको अडियो देउडा र लोक फ्लेवरलाई मिश्रण गरिएको छ । सोमबार काठमाडौंमा आयोजित एक कार्यक्रमका बीच सार्वजनिक गरिएको गीतको भिडियोमा फिल्मका मुख्य कलाकार सौगात मल्ल र बेनिशा हमाल फिचर्ड छन् ।

बाबुल गिरीको संगीत र स्वर रहेको गीतको शब्द गोविन्द भट्टले गरेका हुन् । गायनमा बाबुललाई गायिका गायिका शान्तिश्री परियारले साथ दिएकी छन् । गीतमा प्रवीन सिंहको छायांकन, कविराज गहतराजको कोरियोग्राफी छ ।

फिल्ममा राजबहादुर सानेको निर्देशन छ । कार्यक्रमका प्रतिनिसभा सांसद ज्ञानेन्द्र शाहीले फिल्मको गीत जस्तै फिल्म पनि उत्कृष्ट बनेको होस् भन्दै सफलताको शुभकामना दिए । निर्देशक सानेले ‘सिटामोल’ले आफ्नो करिअर बदल्ने दाबी गरेका छन् । ‘यो हामीले एकदमै दुःखले बनाएको फिल्म हो । म दाबी गरेर भन्न सक्छु कि ‘सिटामोल’ले मेरो करिअर बदल्नेछ । मैले बनाएको अहिलेसम्मकै राम्रो फिल्म समेत सिटामोल हो । यो फिल्मले नेपाली समाजको यथार्थ कथालाई प्रस्तुत गरेको छ’, उनले भने ।

फिल्ममा सौगात र बेनिशासहित श्री कृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार करण परियार, आराध्या राज्यलक्ष्मी डिसीको अभिनय छ । श्री कृष्ण र जानुकाले यही फिल्मबाट नेपाली रजतपटमा डेव्यु गरेका छन् ।

तुल्सी देवी फिल्म प्रालीले जुनतारा फिल्मस्को सहकार्यमा निर्माण भएको फिल्मको कथा प्रदीप भारद्धाज र निर्देशक सानेले लेखेका हुन् । सिमोस सुनुवारको प्रस्तुती रहेको फिल्ममा भुगोलकुमार कार्की र विकाशराज जोशी निर्माता तथा अप्सरा नेपाली, अजय मल्ल र कुमार केसी कार्यकारी निर्माता र गंगाराम श्रेष्ठ सह–निर्माता छन् ।

बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, डिआई कलर राजेन्द्र मोक्तान, साउण्ड डिजाइनर मुकेश शाह, द्धन्द्व निर्देशन देव महर्जन र शंकर महर्जन, राकेश दाहालको पोस्टर डिजाइन, प्रोडक्सन म्यानेजर विकास तामाङ र धनबहादुर राई रहेको फिल्ममा दिव्य सुवेदीको छायांकन छ ।