काठमाडौं । नेपाली अभिनेता, निर्माता विक्रम डि.जोशीले निर्माण गरेको अंग्रेजी फिल्म ‘कामा’ बेलायतको ११ औं नेशनल फिल्म अवार्डस्–२०२५ मा मनोनित भएको छ । लामो समयदेखि बेलायतमा बस्दै आएका निर्माता जोशीको नयाँ फिल्म ‘कामा’ वेस्ट इन्डिपेन्डेन्ट फिल्म क्याटागोरीमा मनोनित भएको हो ।

गत मार्च दोश्रो साता बेलायतका विभिन्न शहरका हलमा प्रदर्शन भई दर्शकको मन जितेको अंग्रेजी भाषाको क्राइम सस्पेन्स फिल्म ‘कामा’ सँगै सो विधाको प्रतिस्पर्धामा ‘ट्रेडिङ वाटर’,‘डिमाइस’,‘बिफोर निक्काहा’,‘ल्याला’,‘ब्ल्याक क्याव’,‘फोर मर्दस्’,‘अ ब्रदर्स बोन्ड’,‘डोन्ट टर्न आउट दि लाइटस्’,‘कुक्सटर–द डार्केष्ट डेज’ र ‘रेपुटेशन’ नामका ब्रिटिश फिल्महरु छन् ।

कडा प्रतिस्पर्धा हुने सो अवार्डको विजेता २ जुलाईमा लण्डनको पोर्चेष्टर हलमा भव्य समारोहका बीच घोषणा गरिने छ । अवार्ड आयोजक नेशनल फिल्म एकेडेमी,बेलायतले १९ मेमा २०२५ को नेशनल फिल्म अवार्डस्को नोमिनेशन सार्वजनीक गर्दै सर्वसाधारणका लागि १९ जुन अर्थात एक महिनासम्म पब्लिक भोटिङ खुल्ला गरिएको आफ्नो वेवसाइटमा उल्लेख गरेको छ । विभिन्न विधामा मनोनीत फिल्म तथा कलाकार मध्येबाट सर्वसाधारणको मतको आधारमा बिजेता घोषणा गरिने जनाइएको छ ।

सन् २०१५ मा स्थापित नेशनल फिल्म एकेडेमीले आयोजना गर्ने नेशनल फिल्म अवार्डस् ब्रिटिशको उत्कृष्ट बार्षिक समारोह मध्येमा पर्दछ । सो अवार्डमा वेष्ट ब्रिटिश फिल्म,वेस्ट एक्टर, एक्ट्रेस,वेस्ट डिरेक्टर,बेस्ट स्क्रिप्ट,बेस्ट इन्डिपेन्डेन्ट फिल्म,बेस्ट न्यु कमरलगायतका बिधामा अवार्ड प्रदान गरिन्छ भने ब्रिटिश सिनेमा योगदान पुर्याएका स्रष्टालाई लाइफ टाइम अचिभ्मेन्ट अवार्डले सम्मान गरिन्छ ।

भीमसेन लामाले निर्देशन गरेका ‘कामा’ को कथा स्व.बिशारद बस्नेतले लेखेका हुन् भने पटकथा र सम्वाद लक्ष्मण सुवेदी,बिक्रम डि।जोशी र हिराल जोशीले तयार पारेका हुन् । यसअघि केही अन्तराष्ट्रिय फेष्टिभलहरुमा अवार्डहरु जितिसकेको फिल्ममा नेपाली अभिनेता टंक धमला,समीर गुरुङ,भारतीय अभिनेत्री पूजा गुप्ता,ब्रिटिश अभिनेता म्याथ्यु वेवफोर्ड,जेमिमा टोम्स,मिया बेनेटलगायतका कलाकार मुख्य भूमिकामा छन् ।

बिक्रम जोशी कार्यकारी निर्माता रहेको फिल्मको निर्मातामा हिराल जोशी छिन् । इश्वर श्रेष्ठ र एमजी अमीन सहनिर्माता रहेको ‘कामा’ को सम्पूर्ण छायांकन बेलायतमा गरिएको हो । यसअघि ‘ह्याप्पी डेज’,‘पासवर्ड’,‘हेलो जिन्दगी’,‘राधा’ लगायतका फिल्म निर्माण तथा अभिनय गरेका जोशी ‘कामा’ को अन्तराष्ट्रिय प्रदर्शन र नयाँ नेपाली फिल्म ‘बिक्रम’ निर्माणको तयारीमा छन् ।