काठमाडौं । काठमाडौंको जडिबुटीमा शुक्रबार बिहान रोकिराखिएको बसमा स्कुटर ठोक्किँदा स्कुटरमा सवार दुई युवाको ज्यान गएको छ।

बिहान २:५० बजे जडिबुटीस्थित आकाशे पुल नजिक सडक छेउमा पार्क गरिएको बा.प्र. ०१–००६ ख ४२४३ नम्बरको अरनिको यातायातको बसमा कोटेश्वरबाट जडिबुटीतर्फ गइरहेको लु ४३ प ४९३८ नम्बरको स्कुटर ठोक्किएको थियो।

ठक्करका कारण स्कुटर चालक र पछाडि सवार व्यक्ति गम्भीर घाइते भएका थिए। उनीहरूलाई तत्कालै ट्रमा सेन्टर पुर्‍याइएको जिल्ला प्रहरी परिसर काठमाडौंका प्रवक्ता एसपी अपिल बोहराले जानकारी दिए।

घाइतेमध्ये स्कुटर चालक २२ वर्षीय शिरिस पौडेललाई बिहान साढे ३ बजे र पछाडि सवार २३ वर्षीय नितेश नेपाललाई बिहान ३:४७ बजे डाक्टरले मृत घोषणा गरेका थिए।

शिरिस पौडेल नवलपरासीको सुनौल–१ स्थायी बासिन्दा हुन् भने हाल भक्तपुरको लोकन्थलीमा बस्दै आएका थिए। नितेश नेपाल काभ्रेपलाञ्चोकको पाँचखाल–२ होस्केका हुन्।

बस चालक दोलखाको भिमेश्वर नगरपालिका–७ स्थायी घर भइ हाल काठमाडौंको काँडाघारीमा बसोबास गर्ने २५ वर्षीय सुभाष तामाङलाई प्रहरीले नियन्त्रणमा लिएर आवश्यक अनुसन्धान थालेको जनाएको छ।