काठमाडौं । प्रतिनिधि सभामा सांसदहरूले आफ्नै नेताको काम र कार्यशैली माथि प्रश्न उठाउन थालेका छन् । सत्तापक्षकै दलले सरकारमा सहभागी मन्त्रीले चित्तबुझ्दो काम नगरेको टिप्पणी उनीहरूको छ ।

आफूहरूले अवसर नपाएको र अवसर पाए कायापलट हुने गरी काम गर्ने दावी सांसदहरूले रोष्टममै उभिएर गर्ने गरेका छन् ।
प्रतिनिधि सभा बैठकमा नेकपा एमालेका सांसद किरणकुमार साहले सुशासन र स्थिरताको नारा लगाउने नेताहरूको व्यवहार त्यसअनुसारको पाउन नसकेको बताएका छन्।

रौतहटसहित देशका विभिन्न ठाउँमा भएका हत्या काण्डमा अनुसन्धानमा सरकार चुकेको भन्दै नागरिकको रगतको मोल राज्यले नबुझेको आरोप लगाए । उनले गृहमन्त्री कै असक्षमताका कारण देशमा अराजकता मौलाएको आरोप लगाए ।

उनले भने, ‘यदी गृहमन्त्रीसँग सरकार चलाउने आँट र योजना छैन भने मलाई एक महिना गृहमन्त्री बनाएर दिनुहोस् । म देखाउँछु सुशासन भनेको केहो ? संविधान र कानून कार्यान्वयन भनेको के हो ? सुशासन कस्तो हुन्छ म देखाउँछु ।’

उनले थप भने, ‘मैले यो कुरा भन्दा हास्यास्पद हुनसक्छ । म नायक फिल्मको हिरो जस्तै सफल हुन सकिन भने यही सदनको बीचमा राजीनामा दिनेछु ।’

उनले आफू गृहमन्त्री भएको खण्डमा हत्यारा जसको भए पनि, अपराध जुन शक्तिसँग जोडिएको भए पनि कुनै हालतमा उन्मुक्ति नपाउने गरी काम गर्ने दावी गरे ।

जनताको रगतसँग हुने खेल अब हामी सहन सक्दैनौँ भन्दै उनले यसका लागि सदन जिम्मेवार हुनुपर्ने बताए ।