काठमाडौं । कोशी प्रदेश सरकारले स्विस सरकारको सहकार्यमा ‘उदय’ परियोजना सुरु गरेको छ, जसअन्तर्गत साना तथा मझौला व्यवसाय (SMEs) को प्रवद्र्धन तथा उद्यमशीलताको विकासमार्फत आर्थिक समृद्धिको नयाँ ढोका खोल्ने लक्ष्य लिइएको छ।

उक्त परियोजनाले प्रदेशमा रोजगारी सिर्जना गर्नुका साथै नयाँ उद्योग स्थापना तथा सञ्चालनमा सहयोग पुर्‍याउने अपेक्षा गरिएको छ। परियोजनाअन्तर्गत व्यवसाय विकास सेवा स्वीकृत सेवा प्रदायकमार्फत प्रदान गरिनेछ भने रु ६० करोडको क्रेडिट ग्यारेन्टी फन्डमार्फत करिब रु ८ अर्ब बराबरको कर्जा सुनिश्चित गरिनेछ। त्यस्तै, रु २८ करोड बराबरको च्यालेञ्ज फन्डमार्फत प्रतिस्पर्धात्मक क्षमता अभिवृद्धि गरिने लक्ष्य लिइएको छ।

परियोजनाले डिजिटल माध्यमबाट ‘इनफर्मेसन पोर्टल’ मार्फत बजारसम्बन्धी सूचना उपलब्ध गराउनेछ। यसै परियोजनाअन्तर्गत बैङ्कहरूसँगको सहकार्यमा बिना धितो रु ३० लाखदेखि रु तीन करोडसम्म कर्जा उपलब्ध गराउने योजना अघि बढाइएको छ।

उदय परियोजना पहिलो चरणमा चार वर्षसम्म सञ्चालन हुनेछ र यस अवधिमा ३,००० रोजगारी सिर्जना गर्ने लक्ष्य राखिएको छ। व्यवसाय विकास प्रमुख विष्णु काफ्लेले परियोजनाको कुल अवधि १० वर्षसम्म कायम राख्ने योजना रहेको जानकारी दिनुभयो।

परियोजनाले कोशी प्रदेशका सबै १४ जिल्लामा विस्तार हुने लक्ष्य राखेको छ। विशेष गरी पहाडी क्षेत्रको बसाइँसराइ रोक्न त्यहाँ रहेका साना तथा मझौला उद्योगलाई प्रवद्र्धन गर्ने र नयाँ उद्योग स्थापना गर्न प्रोत्साहन दिने नीति लिइएको छ।

परियोजनाका टोली नेता अरुण राणाले यो कार्यक्रम उद्यम गर्न चाहने र हाल उद्यम गरिरहेका दुवै समूहका लागि प्रभावकारी हुने बताउनुभयो। मुख्यमन्त्रीका आर्थिक सल्लाहकार डा. मोहन सुवेदीले यस परियोजनाबाट कोशी प्रदेश आर्थिक उचाइमा पुग्ने विश्वास व्यक्त गर्नुभयो।

आर्थिक मामिला तथा योजनामन्त्री रामबहादुर रानाले परियोजनाले बजार प्रवद्र्धनदेखि नयाँ उद्योग स्थापना गर्न मद्दत पुर्‍याउने बताए। मुख्यमन्त्री हिक्मतकुमार कार्कीले यस परियोजनालाई प्रदेशको आर्थिक समृद्धिको कोसेढुङ्गा भन्दै, सफल कार्यान्वयन मार्फत देशभरका लागि उदाहरणीय बनाउन प्रतिबद्धता जनाउनुभयो। उहाँले पर्यटन र कृषिमा पनि प्रदेश सरकारले जोड दिइरहेको उल्लेख गर्दै, पदमार्गमा आधारित पर्यटन विकास र नवउद्यम प्रवद्र्धन कार्यक्रममार्फत समृद्धिको मार्ग प्रसस्त हुने विश्वास व्यक्त गर्नुभयो।