काठमाडौं । तेस्रो अन्तर्राष्ट्रिय आमन्त्रण ताप्लेजुङ गोल्डकपको उपाधिका लागि सलहेस फुटबल क्लब सिराहा र चर्च ब्वाईज फुटबल क्लब ललितपुर भिड्ने भएका छन्।

बिहीबार भएको दोस्रो सेमिफाइनलमा झापाको रेडस्टार फुटबल क्लबलाई २–० ले पराजित गर्दै सलहेसले फाइनलमा स्थान बनाएको हो। यसअघि नै चर्च ब्वाईजले पहिलो सेमिफाइनलमा इटहरीको द योङ ब्रदर्श फुटबल क्लबलाई टाइब्रेकरमा हराएर फाइनलमा पुगिसकेको थियो।

फाइनलमा सलहेसको यात्रा
सलहेस फुटबल क्लबका लागि युसुफ मलिक नायक बने। उनले खेलको १३औँ र ४८औँ मिनेटमा गरी दुई गोल गर्दै आफ्नो टिमलाई फाइनलमा पुर्‍याएका थिए। यस जितसँगै अब सलहेसले शनिबार फुङलिङस्थित भानुजन माविको मैदानमा चर्च ब्वाईजसँग उपाधिका लागि प्रतिस्पर्धा गर्नेछ।

पुरस्कार राशी
प्रतियोगिताको विजेताले ७ लाख २ हजार ८२ रुपैयाँ नगदका साथ ट्रफी, मेडल र प्रमाणपत्र प्राप्त गर्नेछ। त्यसैगरी, उपविजेताले ३ लाख ५० हजार ८२ रुपैयाँ प्राप्त गर्नेछ।