काठमाडौं । नेतृत्वको टकराबले विभाजन भएको गैरआवासीय नेपाली संघ (एनआरएनए) को बृहत् एकताको घोषणा भएको छ । आइतबार प्रधानमन्त्री सुशीला कार्कीको रोबहरमा ११ औं अन्तर्राष्ट्रिय महाधिवेशनबाट निर्वाचित कार्यसमिति अध्यक्ष डा. बद्री केसी र एकताको महाधिवेशनबाट निर्वाचित कार्यसमितिका अध्यक्ष महेश कुमार श्रेष्ठले एकता गरेका हुन् ।

एकतासँगै अब फेब्रुअरी अन्तिममा १२औँ महाधिवेशन गर्ने सहमति भएको छ । केसी र श्रेष्ठ नेतृत्वका दुवै समितिलाई स्वीकार गर्दै गैरआवासीय नेपाली संघको बाह्रौँ महाधिवेशन ढिलोमा सहमति भएको मितिले ६ महिना भित्र सम्पन्न गर्ने निर्णय भएको छ ।

महाधिवेशनको तयारीका लागि ११ सदस्यीय स्टेरिङ कमिटी, निर्वाचन समिति र मोनिटरिङ समिति गठन गर्ने सहमति भएको छ । महाधिवेशन नहुँदासम्म दुवै अध्यक्ष बद्री केसी र महेश श्रेष्ठको संयुक्त नेतृत्व रहनेछन् । १२औँ महाधिवेशनमा सहमतिका आधारमा नेतृत्व चयन गर्ने प्रयास गरिने पनि सहमति भएको छ ।

पारदर्शिता र निष्पक्षताका लागि महासचिव गौरीराज जोशी र वावुराम लामालाई सिष्टम व्यवस्थापन सम्बन्धी सम्पूर्ण अधिकार रहने गरी एक सिष्टम व्यवस्थापन समिति गठन गरेको छ ।

विगत दशौँ र एघारौँ महाधिवेशनका सन्दर्भमा विभिन्न परिस्थितिका कारण कुल आचार्य, रबिना थापा, डा. वद्री केसी, विनोद कुँवर र राजेन्द्र कुमार शर्माको अध्यक्षतामा गठित कार्यसमितिहरूलाई पूर्व कार्यसमितिको रुपमा अभिलेखिकरण गर्ने पनि सहमति भएको छ ।

एघारौँ महाधिवेशनबाट निर्वाचित कार्यसमितिका महासचिव र कोषाध्यक्षले आफ्नो प्रतिवेदन पेश गरी महाधिवेशनबाट अनुमोदन गराई, एघारौँ महाधिवेशनबाट निर्वाचित अध्यक्ष केसीले एकताको महाधिवेशनबाट निर्वाचित अध्यक्ष श्रेष्ठलाई हस्तान्तरण गर्ने पनि सहमति भएको छ ।

एनआरएनको आधिकारिकता लगायतका विषयमा अदालतमा परेका मुद्दाहरू सबै पक्षले फिर्ता लिने वा आपसी सहमतिका माध्यमबाट समाधान गर्ने भएका छन् । गैरआवासीय नेपाली संघका दुबै पक्षको आर्थिक पाटोलाई पारदर्शी एवं विश्वासिलो बनाउन स्वतन्त्र तृतीय पक्षबाट अडिट गराउने भएका छन् ।

‘नेपालीका लागि नेपाली’ भन्ने मूल मन्त्रका साथ सन् २००३ मा सुरु भएको गैरआवासीय नेपाली अभियान विभिन्न मुलुकमा छरिएर रहेका नेपालीहरूलाई एकताबद्ध गर्दै, उनीहरूले आर्जन गरेको ज्ञान, सीप, प्रविधि र पुँजीलाई नेपालको सामाजिक तथा आर्थिक विकासमा सदुपयोग गर्ने उद्देश्यका साथ अघि बढेको थियो ।