काठमाडौं । लगातार दोस्रो दिन पनि शेयर बजार ओरालो लागेको छ। सोमबार ८.२४ अंकले घटेर २६२२.९० बिन्दुमा पुगेको नेप्से परिसूचक मंगलबार थप २७.६४ अंकले घट्दै २५९५.२४ बिन्दुमा झरेको हो। यस दिन सेन्सेटिभ इन्डेक्स ३.९३ अंक, फ्लोट इन्डेक्स १.९१ अंक र सेन्सेटिभ फ्लोट इन्डेक्स १.३० अंकले घटेका छन्।

मंगलबार ३२२ कम्पनीका शेयर कारोबार हुँदा जम्मा ५ अर्ब १५ करोड ७ लाख ६८ हजार ९३८ रुपैयाँ बराबरको १ करोड ३ लाख ४३ हजार ८९८ कित्ता शेयर किनबेच भएको नेपाल स्टक एक्सचेञ्ज (नेप्से) ले जनाएको छ। कारोबार संख्या पनि घट्दै ४६ हजार ८७५ पटकमा सीमित भएको छ।
यसअघि सोमबारको कारोबार ६ अर्ब ५ करोड रुपैयाँ बराबरको १ करोड ३ लाख ४३ हजार कित्ता शेयरमा भएको थियो।

यस दिन बजारमा नयाँ रूपमा सूचीकृत माबिलुङ इनर्जी लिमिटेड को शेयर मूल्य सकारात्मक सर्किट लेभलमा पुगेको छ। कम्पनीको शेयरमूल्य ३१.७० रुपैयाँले बढ्दै प्रतिकित्ता ३४९.४० रुपैयाँमा कारोबार भएको हो। त्यसैगरी, फर्स्ट माइक्रोफाइनान्स लघुवित्त वित्तीय संस्था को शेयरमूल्य ९ प्रतिशतभन्दा बढी बढेर ८० रुपैयाँले वृद्धि हुँदै प्रतिकित्ता ९५० रुपैयाँमा कारोबार भएको छ।

मंगलबारको कारोबारमा एनआरएन इन्फ्रास्ट्रक्चर एन्ड डेभलपमेन्ट अग्रस्थानमा रह्यो। उक्त कम्पनीको शेयर कारोबार रकम करिब २७ करोड रुपैयाँ पुगेको छ। त्यस्तै राधी विद्युत कम्पनी को २२ करोड रुपैयाँ र यूनियन हाइड्रोपावर कम्पनी को साढे १८ करोड रुपैयाँ बराबरको शेयर कारोबार भएको छ।

यस दिन नेप्सेका १३ वटै उपसमूहको परिसूचक घटेका छन्। तीमध्ये वित्त उपसमूह २.२१ प्रतिशतले सर्वाधिक घटेको हो। त्यस्तै, विकास बैंक, जलविद्युत, जीवन बीमा, निर्जीवन बीमा र अन्य उपसमूहहरू पनि १ प्रतिशतभन्दा बढीले घटेका छन्।

विश्लेषकहरूले पछिल्ला दिनमा लगानी कर्ताको मनोबल कमजोर देखिएको र बजारमा तरलता अभावसँगै नाफा बुकिङ मनोवृत्ति हावी भएको टिप्पणी गरेका छन्।