निफ चौंथो संस्करणको अवार्ड वितरण, तथा पाँचौंको आवेदन खुल्ला



नेपाल अन्तर्राष्ट्रिय फिल्म महोत्सव (निफ) को चौथो संस्करणको अवार्ड वितरण कार्यक्रम सम्पन्न भएको छ । यही साउन १७ गते आइतबार भएको उक्त कार्यक्रममा सातवटा राष्ट्रिय पुरस्कार तथा नेपालले जीतेको एउटा अन्तर्राष्ट्रिय पुरस्कार वितरण गरिएको थियो । कार्यक्रमका प्रमुख अतिथि तथा चलचित्र विकास वोर्डका अध्यक्ष दयाराम दहालले वियजी फिल्म तथा फिल्मकर्मीहरूलाई ट्रफी तथा नगद पुरस्कार प्रदान गरे ।

नेपाली फिचर फिल्म प्रतियोगिता अन्तर्गत बेस्ट फिचर फिल्म अवार्ड ‘आमा खाँन्डो’ले नगद पुरस्कार १ लाखसहित ट्रफी र प्रमाण पत्र प्राप्त गरेको छ । त्यस्तै वेष्ट पेन्डेमिक फिल्म अन्तराष्ट्रिय प्रतिष्पर्धामा पुरस्कृत ‘सिभिल सोल्जर’का लागि गणेश पाण्डेले नगद पचास हजार सहित ट्रफी र प्रमाण पत्र प्राप्त गरेका छन् । यसैगरी नेपाली सर्ट फिल्म प्रतियोगिताअन्तर्गत राजेशप्रसाद खत्री को अ स्केयरक्रोले बेस्ट सर्ट फिल्म अवार्ड नगद पचास हजार र ट्रफी प्राप्त गरेको छ ।

पुरस्कार वितरण कार्यक्रममा वेष्ट सिनेमाटोग्राफि नेशनल फिचर फिल्म–शिरिस गुरुङ (लाटो कोसेरो), वेष्ट स्क्रिन प्ले नेशलन फिचर फिल्ममा–सेर्गियो बासो (सरिता–टेल मि हु एम आई ), वेष्ट एक्ट्रेस नेसनल फिचर फिल्ममा सरिता गिरी (लाटो कोसेरो), वेष्ट एक्टर नेसनल फिचर फिल्ममा नविन सिल्पकार (लाटो कोसेरो) ले ट्रफी तथा प्रमाण पत्र प्रदान गरिएको थियो ।

अवार्ड वितरण कार्यक्रमा बोल्दै प्रमुख अतिथि दयाराम दहालले कोरोनाको कारण नेपाली चलचित्र गम्भिर अवस्था रहेको भन्दै यस क्षेत्र पुनः स्थापित गर्न सम्पूर्ण रुपले आफू लागि परेको बताएका छन् । नेपाल अन्तराष्ट्रिय चलचित्र महोत्सव नेपालको एकमात्र प्रतिनिधिमूलक अन्तर्राष्ट्रिय अवार्ड भएकाले सबै नेपाली फिल्मकर्मी साथ दिनुपर्ने उनले बताए ।

त्यस्तै कार्यक्रम निफका संयोजक केपी पाठकले चौंथो संस्करण विजयी फिल्मकर्मीहरूलाई बधाई दिँदै आफ्ना केही तिता अनुभव पनि सेयर गरे । विशेष गरेर नेपाली फिल्मकर्मीले नेपाल अन्तराष्ट्रिय फिल्म महोत्सवमा सहभागी हुन देखाएको उदासिनपनि दुखेसो पोखेका पाठकले पाचौ निफमा चौथोमा जस्तो फिचर फिल्म प्राप्त गर्न दुःख नहुने आशा ब्यक्त गर्दै अन्तराष्ट्रिय रुपमा ख्याति कमाई रहेको यस महोत्सव नेपाली फिल्मकर्मिको लागि पनि महत्वपूर्ण प्लेटफोर्म भएको र अन्तरास्ट्रीय बजारिकरणमा लागि रहेको हुनाले यस महोत्सबमा सम्पूर्ण नेपाली चलचित्रकर्मी र क्षेत्रले सक्रीय सहभागीता जनाइ आफ्नो महसुस गर्दै सो अबसरको सदुपयोग गर्न पनि आग्रह गरेका छन् । यसैगरि जुरी जुरी सदस्यको तर्फबाट राजभाइ सुवालले यो महोत्सवका अन्य अन्तराष्ट्रिय जुरीहरूसँगको सहकार्यको अनुभव सेयर गरेका थिए ।

कोरोना महामारीका कारण भच्र्यूल रुपमा गत वैशाख २३ देखि २७ सम्म सम्पन्न भई अवार्ड घोषणा भएको थियो । भच्र्यूल रूपमा भएको कारण पुरस्कार वितरण हुनसकेको थिएन । तर, कोरोना केही कम भई सरकारले पनि केही गतिविधि खुला गरेको कारण चौथो नेपाल अन्तराष्ट्रिय फिल्म महोत्सव (निफ) पुरस्कार वितरण समारोह सरकारी पोर्टोकलको पालना गर्दै सिमित व्यक्तिहरूको उपस्थितिमा आज भएको हो । ‘विश्वका कथाहरूको उत्सव नेपाल अन्तरास्ट्रीय चलचित्र महोत्सब’ भन्ने नाराका साथ आयोजना हुदै आएको नेपाल अन्तराष्ट्रिय फिल्म महोत्सव (निफ) को पाँचौं संस्करणको आवेदन खुला गरिएको औपचारिक रुपमा घोषणा पनि आजै गरिएको छ ।

गत असार १७ (जुलाई १, २०२१) गतेदेखि नै आवेदन खुला गरिएको हो । राष्ट्रिय तथा अन्तराष्ट्रिय फिल्मकर्मीहरूले २०७८ पौष १० (डिसेम्बेर २५ , २०२१) गतेसम्म आफ्ना फिल्म तथा वृत्तचित्र आवेदन दिन सक्नेछन् । त्यस्तै २०७८ माघ ११ (जनवरी २५, २०२२) गतेमा छनौट भएका चलचित्रहरूको घोषणा गरिनेछ । निफको पाँचौ संस्करण २०७८ चैत १० देखि १४ ( २०२२ मार्च १०देखि १४ मार्च ) गतेसम्म हुनेछ ।

प्रतिक्रिया दिनुहोस्
© 2021 Intro Nepal