एउटा नेपालीको जीवन सघंर्षको कथामा आधारित डा. गैह्रेको 'एक्लै एक्लै जीवनसँग...'

बेलायतमा एक्लै एक्लै जीवन सँग लड्न कहाँ सक्थेँ सार्वजनिक गरिएको छ। डा.योगेन्द्र गैह्रेले परदेशको सघंर्ष र जीवन कथा बोल्ने गीति एल्बम 'एक्लै एक्लै जीवनसँग'को पहिलो म्युजिक भिडियो सार्वजनिक गरेका हुन् ।

उक्त गीतको म्युजिक भिडियो लन्डनमा आइतबार आयोजित पत्रकार सम्मेलन मार्फत सार्वजनिक गरिएको छ । प्रमुख अतिथि ग्रीनवीच बरोका काउन्सिलर जीत राना भाटले म्युजिक भिडियो विमोचन गरेका हुन् । म्युजिक भिडियोको विमोचन गर्दै काउन्सिलर राना भाटले एउटा पारिवारिक कथा र परिवेश समेटेर म्युजिक भिडियो निर्माण गरेको भन्दै खुसी व्यक्त गरे ।

नेपालको पुर्खौली घर स्याङ्जाका डा.गैह्रेले आफूले भोगेको जीवनलाई ह्रदय छुने म्युजिक भिडियोमा उतारेको भन्दै समग्र गीतको विषयमा बताएका थिए । बेलायतको  साउथ ह्यान्टममा स- परिवार सहित बस्दै आएका गैह्रेले गीतमा आफैले स्वर दिएका छन् ।

त्यस्तै, संवाद पनि डा.गैह्रेकै रहेको छ भने गीतलाई करुण थापाले सिर्जना गरेका हुन् । उक्त गीतमा न्ह्यू बज्राचार्यको सगींत रहेको छ भने,प्रडक्सन थ्रीका राजदीप राईले सम्पादन र छायाकंन तथा भिडियोलाई प्राविधिक सहयोग फोटो/ भिडियो पत्रकार एज्रा श्रेष्ठले गरेका छन् । त्यस्तै मोडेल सुरेश श्रेष्ठले भिडियोलाई संयोजन गरेका छन् ।

गीतको निर्माताको रूपमा डा. गैह्रेकै श्री मति ज्योति श्रेष्ठ गैह्रे रहेकी छन् भने कथा समन्वय र निर्देशन स्वंम डा. योगेन्द्र गैह्रेको नै रहेको छ । कला र संगीतमा पारिवारिक पृष्ठभूमि भएर पनि होला पारिवारिक कथावस्तु र डा.गैह्रेकै आफ्ना २ छोराको अभिनय रहेको म्युजिक भिडियोले प्रवासमा रहेर नेपालीहरूले पनि परिवारसँग कसरी जीवन व्यतीत गर्छन् भन्ने वास्तविकता बोलेको छ ।

म्युजिक भिडियोले रोजगारीको खोजीमा विदेशिनु पर्ने नेपालीको कथामा आधारित गीतले हाम्रो सामाजिक एवम् हरेक घरको मार्मिक चित्रण गरेको छ।