काठमाडौं । पर्वतको बिहादी गाउँपालिका-२ स्थित अम्बारी आधारभूत विद्यालयमा सुविधा सम्पन्न आधुनिक शौचालय निर्माण सम्पन्न भएको छ ।

भूकम्पले शौचालय भत्किएसँगै समस्या झेलिरहेका विद्यार्थीलाई नयाँ अनि आधुनिक शौचालयको निर्माणले राहत मिलेको छु । नयाँ शौचालय प्रयोग गर्न पाउँदा विद्यार्थीले खुसी व्यक्त गरेका छन् ।

विद्यालयमा छात्र र छात्राका लागि छुट्टाछुट्टै दुई आधुनिक शौचालय भवन तयार पारिएको छ । नवनिर्मित भवनको उद्घाटन पनि गरिएको छ ।
दक्षिण कोरियाको सुवन स्पेशल सिटी सरकार, वर्ल्ड ट्वाइलेट एसोसिएसन तथा मिस्टर ट्वाइलेट सीम जे-डक फाउन्डेसनको सहयोग निर्मित शौचालयको एक कार्यक्रमकाबीच उद्घाटन गरिएको छ ।

निर्माण कार्यमा बिहादी गाउँपालिका र गुड नेबर सर्विस एसोसिएसन नेपालले साझेदारी गरेका थिए । उद्घाटन कार्यक्रममा वर्ल्ड ट्वाइलेट एसोसिएसनका महासचिव वोन-ह्योङ ली, गङ्गसेओ विश्वविद्यालयकी प्राध्यापक तथा वर्ल्ड ट्वाइलेट एसोसिएसनकी सदस्य डा. सञ्जु पौडेलसहित स्थानीय प्रतिनिधिको सहभागिता थियो।

नयाँ सार्वजनिक शौचालय उद्घाटनसँगै विद्यालयका विद्यार्थीलाई सरसफाइमैत्री सुविधा उपलब्ध भएको छ । यी आधुनिक र पहुँचयोग्य शौचालयले विद्यालयका बालबालिकाको स्वास्थ्य सुधारमा ठूलो योगदान पुग्ने विश्वास लिइएको छ ।

पोखरामा पनि अन्तर्राष्ट्रिय मापदण्डको शौचालय बन्ने
यसैबीच पोखरामा अन्तर्राष्ट्रिय मापदण्डको शौचालय निर्माण हुने भएको छ । अन्तर्राष्ट्रिय स्तरको शौचालय निर्माण गर्न विषयमा छलफल गर्न कोरियाली टोलीले पोखरा महानगरपालिकाका प्रतिनिधिसँग भेटेको छ ।

विश्व शौचालय सङ्घका महासचिव वोन-ह्योङ ली नेतृत्वको कोरियाली प्रतिनिधि मण्डलले पोखरा महानगरपालिकाका मेयर धनराज आचार्यसँग भेटवार्ता गरेको मेयरको सचिवालयले जनाएको छ ।

भेटका क्रममा सङ्घका महासचिव लीले पोखरा महानगर क्षेत्रमा अत्याधुनिक प्रविधियुक्त सार्वजनिक शौचालय निर्माणका लागि सहकार्यको प्रस्ताव गरेका छन् । महानगर प्रमुख आचार्यले पोखराका सार्वजनिक स्थानमा शौचालय निर्माण गर्ने महानगरको योजना सुनाउँदै सहकार्य गर्न तयार रहेको बताएका थिए ।

भेटवार्तामा पोखरा महानगरपालिकाकी उपप्रमुख मन्जुदेवी गुरुङ, प्रमुख प्रशासकीय अधिकृत मुक्तिराम अर्याल, प्रवक्ता मोतीलाल तिम्सिना, वडा नं. १७ की अध्यक्ष राधिका शाही योगी, सरसफाइ शाखा प्रमुख बलराम पाठक, विश्व शौचालय सङ्घका निर्देशक योङ चान सीम र सङ्घकी सदस्य डा. सन्जु कुमारी पौडेललगायतको सहभागिता थियो ।

पोखरा महानगरले स्वच्छ, सफा अनि व्यवस्थित शहर हुन सुविधा सम्पन्न शौचालय निर्माण अत्यावश्यक रहेको उल्लेख गर्दै विश्वका धेरै शहरमा कोरियाली नमूनाका शौचालय उत्कृष्ठ मानिएको र ती अभ्यास पोखरामा पनि प्रयोग गरिने जनाएको छ ।