काठमाडौं । ‘नक्कली प्रचण्ड’का रुपमा परिचित कलाकार घनश्याम गौतमको निधन भएको छ । दुई वर्षदेखि क्यान्सरबाट थलिएका गौतमको भक्तपुरस्थित काठमाडौं क्यान्सर सेन्टर ताथलीमा उपचारका क्रममा मंगलबार बिहान १२ः१० मा निधन भएको हो ।

४२ वर्षअघि झापाको गौरादहस्थित जोरघरेमा जन्मिएका घनश्यामले ११ वर्षको उमेरदेखि हातेमालो रेडियो कार्यक्रमबाट कलाकारिता यात्रा सुरु गरे । उनले हालसम्म ३ हजारभन्दा बढी रेडियो नाटक, हजारौं सडक नाटक तथा सयौं स्टेज नाटकमा अभिनय गरिसकेका छन् ।

स्क्रिप्ट लेखक, कलाकार, गीतकार र निर्देशक समेत रहेका उनले ‘मेरी बास्सै’, ‘झ्याइँकुटी झ्याइँ’, ‘जिरे खोर्सानी’, ‘गोलमाल’, ‘टेन टु फाइभ’, ‘खासखुस’, ‘हाक्काहाक्की’जस्ता टेलिफिल्ममा अभिनय गरेका छन् । उनले ‘शेरे द शेरबहादुर (जोक्स सिरिज)’, ‘ट्वाकेन्द्र निवास’जस्ता कमेडी टक शो पनि चलाएका छन् ।

उनको मंगलबार नै पशुपति आर्यघाटमा अन्त्येष्टि गरिने परिवारजनले जनाएको छ ।