नारायणी किनारको जनसहभागिताले एमालेले बहुमत ल्याउने प्रष्ट भयो: उपाध्यक्ष ज्ञवाली



नेकपा (एमाले) का नवनिर्वाचित उपाध्यक्ष युवराज ज्ञवालीले आफ्नो पार्टीप्रति जनताको आकर्षण निरन्तर बढ्दो रहेको दाबी गरेका छन् ।

आज (बिहीबार) रिपोर्टर्स क्लब नेपालले गरेको साक्षात्कारमा बोल्दै उनले एमाले नै आगामी निर्वाचनपछि पनि पहिलो दल बन्ने र बहुमत ल्याउने दाबी गरे । उनले भने, ‘नेपालको इतिहासमा यति धेरै जनसहभागिता कुनैपनि पार्टीको कार्यक्रममा भएको थिएन । मैले सबै दलका महाधिवेशन, अधिवेशन, आमसभा हेरेको छु, यसपटकको हाम्रो महाधिवेशनमा पाँच लाख जनता उतार्ने योजना थियो । तर, त्योभन्दा पनि धेरै जनसमूदायको उपस्थितिमा हाम्रो उद्घान सम्पन्न भयो । एमालेप्रति जनताको आकर्षण निरन्तर बढ्दो अवस्थामा छ । जनहसहभागिताको हिसाबले १०औं महाधिवेशन ऐतिहासिक भयो । इतिहासमै कुनै एउटा पार्टीले यत्रो जनसमुदायको उपस्थितिमा कार्यक्रम गरेको थिएन । अहिले पनि एमाले संसद्मा सबैभन्दा ठूलो पार्टी छ । आउने दिनमा पनि यो पार्टीले बुहमत ल्याउने कुरा स्थापित भैसकेको छ । यो कुरा चितवनको जनसभाले पुष्टि भयो ।’

साक्षात्कारमा उपाध्यक्ष ज्ञवालीले फेरि पनि वामपन्थीहरुबीच एकताको आवश्यकत्ता रहेको औंल्याए । उनले भने, ‘एमालेसामू चूनौती छन्, एउटा पार्टी फुटेर तीन टुक्रा भयो । एमाले पनि फुटेको छ । हामीले सरकार ५ वर्ष चलाउन सकेनौं । अहिले कांग्रेसको नेतृत्वमा सरकार बनेको छ । हामीले कमीकमजोरी कहाँ रह्यो भनेर समीक्षा गर्नुपर्छ । हामीले विचार, प्रवृत्ति, सोच, दृष्टिकोणलाई समीक्षा गर्न जरुरी छ । पार्टीलाई एकताबद्ध बनाउनुपर्छ । मैले आफ्नो तर्फबाट सक्दो भूमिका निर्वाह गर्छु । फेरि पनि बामपन्थीबीच एकता आवश्यक छ । हामीले नेकपाको एकता बचाउन सकेनौं । अब एकले अर्कालाई आरोपित गरेर मात्रै हुँदैन । अब एउटा नेतालाई मात्रै दोष दिएर हुँदैन । एकता बचाउन नसक्नुमा सबैको दोष छ । जनमत किन टिकाउन सकेनौं ? भनेर आत्मसमीक्षा गर्नुपर्छ । विगतका कुरामा आरोपित गर्नुहुँदैन । फेरि पनि बामपन्थीहरु र कम्युनिस्टहरुको बीचको एकता आवश्यकत्ता छ । सबै पार्टीका नेता तथा कार्यकर्ताहरुले सकारात्मक रुपले सोच्नुपर्छ ।’

उनले एमाले अब सशक्त भएर अघि बढ्ने पनि दाबी गरे । उनले भने,‘हामी कमिकमजोरी सच्याएर र फराकिलो छाती लिएर अघि बढ्नेछौं । समृद्ध नेपाल, सुखी नेपाली बनाउनेछौं । यो नारा सफल बनाउनेछौं ।’ ज्ञवालीले महाधिवेशन भव्य र सफलरुपमा सम्पन्न भएको दाबी गरे । यद्यपि महाधिवेशनमा केही कमिकमजोरी भने रहेको उनले स्विकारे । उनले भने,‘बन्दसत्रमा कमिकमजोरी भयो । यत्रो ठूलो कार्यक्रम आयोजना गर्दा अलि अलि त्रुटी, कमजोरी हुन्छन् । शतप्रतिशत राम्रो हुने भन्ने कुरा दुनियाँमा कहीँ पनि हुँदैन ।’

उनले आफूले पार्टीको चौथोदेखि १०औं महाधिवेशनसम्म सक्रियताका साथ भाग लिएको पनि स्मरण गराए । उनले भने, ‘चौथोदेखि अहिले चितवनमा सम्पन्न भएको १० औं महाधिवेशनसम्म म आँफै सहभागी छु । यी सबै महाधिवेशनमा म निर्वाचित भएको छु । म सक्रिय छु । ती सबै महाधिवेशन कुनै सहमति र कुनै प्रतिस्पर्धामा गरेका छौं । अहिलेको महाधिवेशनको नयाँ विशेषता भनेको धेरै संख्या सहमतिमा छनौट भएको छ । केही प्रतिस्पर्धाको माध्यमबाट छनौट भए । दुवै तरिकाबाट हामीले नेतृत्व छनौट गरेका छौं । यो महाधिवेशनमा उन्नत किसिमको अभ्यास ग¥यौं । हार्दिकताासाथ महाधिवेशन सम्पन्न भयो । असाध्यै शान्तिपूर्ण वातावरणमा व्यवस्थित् ढंगले सम्पन्न भएको छ। यसर्थ प्रतिस्पर्धा र सहमतिको आधारमा नेतृत्व छनौट भएकोले यो महाधिवेशनको नयाँ विशेषता हो । नयाँ अभ्यास हो । लोकतान्त्रिक अभ्यासको कारणले पनि यो महत्वपूर्ण रह्यो। प्रतिनिधिहरु खुशीसाथ फर्किनुभएको छ । कतिपयमा असन्तुष्टि होला । आउनैपर्ने साथीहरु छुट्नुभएको छ ।’

उनले नेपालको राजनीतमिा एमालेले मूख्य भूमिका निर्वाह गर्नुपर्ने भएकोले आफूहरु सोहीअनुसार तयारीका साथ अघि बढेको पनि सुनाए । उनले भने,‘अहिले पनि जनमत एमालेको पक्षमा रहेको छ । एमालेसँग दुई तिहाइको बहुमतको सरकार सञ्चालन गरेको अनुभव छ । विगतको सकारात्मक र नकारात्मक अनुभवबाट शिक्षा लिएर एमालेले सिंगै मुलुकलाई हाँक्ने गरी आफ्नो योजना, नीति र कार्यक्रम प्रस्तुत गरिसकेको छ । अब पार्टीलाई अझै सशक्त, एकताबद्ध र सुदृढ रुपमा अघि बढाउनुपर्छ । पार्टीलाई नयाँ उचाइमा अघि बढाउनुपर्छ । हामीले लडेर ल्याएको संघीय लोकतान्त्रिक गणतन्त्र छ, यो ऐतिहासिक उपलब्धिलाई जोगाउने, बचाउने र लोकतन्त्रलाई अझै सुदृढ बनाउनुपर्छ । एमालेले सबै लोकतान्त्रिक पार्टीसँग मित्रतापूर्वक सम्बन्ध राखेको छ । फरक विचारप्रति सहिष्णु हुनुपर्छ । यो एक नम्बर पार्टी बन्नुुपर्छ । कसैलाई गालीगलौज गर्नुहुँदैन् । अन्तरविरोध चर्काउने होइन, सबैलाई मिलाएर लैजानुपर्छ । यो महाधिवेशनमा कतिपय छुटेकालाई १० प्रतिशत मनोनिततर्फ ल्याउँछौं । आउनैपर्ने साथीहरु आउनुहुन्छ । नेतृत्वले गम्भीर रुपमा ध्यान पु¥याउनेछ ।’

प्रतिक्रिया दिनुहोस्
© 2022 Intro Nepal